友會介紹-香港大聖劈掛門

大聖劈掛門即係指兩門功夫，《關外大聖門》即係指猴拳，《少林劈掛門》係北方一種長橋大馬。猴拳由陝西人寇四所創，寇四傳人耿德海宗師自細跟阿爸耿榮貴學家傳嘅劈掛門武術，後來又得寇四猴拳真傳，其後來香港設館授徒，將兩派武術合併，創立咗「大聖劈掛門」。

大聖門武術主攻下三路，而劈掛門武術就主攻上三路，重有七十二把擒拿手主攻關節。

民初內戰期間，陝西人寇四因為打傷軍閥瓜牙而畀人追捕，畀耿榮貴救咗，但寇四最終都畀人捉咗去坐監。坐監期間，寇四整理自己嘅武術嗰陣，睇到啲馬騮仔紮紮跳，動作靈巧，就啟發咗佢武術思路，創咗套「五路猴拳」，即係猴拳或者大聖拳。

出獄之後，佢走去搵返救過佢嘅耿榮貴諗住報恩，點知耿榮貴已經仙遊。佢見耿榮貴個仔耿德海已經長大成人，就將佢套猴拳傳授畀佢。

耿德海一直有跟老豆耿榮貴學劈掛拳，呢門武術係佢家傳絕學。耿德海喺劈掛拳基礎上，加入寇四真傳嘅猴拳，就創立「大聖劈掛門」。

南傳

耿德海宗師後來做咗鏢師，又喺南京中央國術館做刀、劍科總教練。喺八年抗戰嗰陣，又喺東北軍教大刀隊，因為咁而成為日軍針對目標，之後走咗去廣州教咗幾年之後再南移嚟咗香港，1930年成立咗民眾國術社，開始發揚大聖劈掛門拳術，喺咁多弟子之中，最享譽武林嘅有馬騮王之稱嘅陳秀中宗師。

1954年陳秀中宗師得耿德海許可開館授徒，在香港培育一班出色拳手，有陳觀泰、陳少川、萬榮佳、劉偉民、冼林沃、黃秋生、高雄、黃志偉、冼灝英、李飛標、周強、何家輝、梁富新等。

 而「大聖劈掛門」第三代傳人李飛標老師於1987年奉師命設館授徒，命名為「李飛標國術體育會」，發揚大聖劈掛門拳術，同時更積極參與國術總會舉辦之賽事，成績美滿，獲獎無數。